जसको घर, सडक र यात्रु आफन्त हुन्

    0
    4972

    यज्ञमूर्ति तिमिल्सिना
    पाल्पा । सिरदेखि पाउँसम्म कुनै बैंकको सुरक्षागार्डको जस्तो पोशाक । हातमा एउटा लट्ठी छ । कम्मरसम्म झुण्डिएको सिठ्ठी र पुरानिएर च्यातिनै लागेका जुत्ता । उनलाई झट्ट हेर्नेहरुले सुरक्षाकर्मी नै होला भन्ने अड्कल काट्छन् । उक्त ब्यक्ति सुरक्षाकर्मी पनि हैन तर सेवा बर्दी लगाएको प्रहरीको भन्दा कम छैन । उहाँलाई सबैले कलकत्ते दाई नामले चिन्छन् र काम नागरिक प्रहरीको ।

    ४३ वर्षदेखि निरन्तर नागरिक प्रहरीको भूमिका निर्वाह गरेका टोपप्रसाद श्रेष्ठ (कलकत्ते दाई) लाई नचिन्ने कमै होलान् । शरीर बुढ्यौलीतर्फ ढल्किएपनि उनको सक्रियता भने उस्तै छ । २००२ सालमा स्यांगजा जिल्लाको सिरुखर्क गाविसमा जन्मिएका कलकत्ते दाई २०३२ सालतिर कामको खोजीमा पाल्पा आएका बेला देखि नै पाल्पा बसपार्कको सवारी ब्यवस्थापन कार्यमा लागेका छन् । सवारी चालक र यात्रुहरुका बीच कलकत्ते दाईले परिचित उनले बुढ्यौलीमा पनि यसरी देखाएको सक्रियता देखेर सबैले आदर गर्छन् ।

    टाढाबाट आएका यात्रुलाई गन्तब्यमा पुर्याउन सहयोग गर्ने, चालक तथा सहयोगीलाई सवारीको साधनको अवस्था जाचबुझ गरेर मात्रै गन्तब्यमा लाग्न सुझाव दिने, मादक पदार्थ सेवन नगर्न अनुरोध गर्ने, सवारी पार्किङ्गका लागि उपयुक्त स्थान देखाइने उनको दैनिकी हो । यसरी काम गरेबापत उनले कत्तिपनि तलब पाउनुहुन्न । सवारी चालकहरुले आदर दिएको ५,१० रुपियाँले उनको गुजारा चल्दै आएको छ ।

    “सानै छँदा आमाको मृत्यु भएपछि बा ले अर्को बिहे गरे म सानो छँदा पनि पढेर समाजसेवी बन्ने रहर थिए तर पढ्न पाइन त्यसैले अहिले सडकमा बसेर यात्रु सेवा गर्दैछु ।” उनले भने । यो मैले लगाएको सबै कपडा जडौरीमा आएको हो । सबैले मलाई माया गर्छन् । उनको भनाई छ । “यो लट्ठी त देखाउनको लागि मात्रै हो कहिल्यै यसको प्रयोग गर्नुपरेको छैन कतिपय लफंगा केटाहरु पनि मलाई देखेपछि आफै डराएर भाग्छन् ।” उनले आफ्नो अनुभव सुनाए ।

    श्रेष्ठको परिवारमा अरु कोही छैन उहाँ एक्लै हो । बिहान भाले बास्न नभ्याउँदै देखि उनको ड्युटी सुरु हुन्छ र साँझ आँखाले मेसो पाउञ्जेलसम्म सडकमै खटिन्छन् । सामान्य जागिरेको भए यो बीचमा धेरै बिदाहरु पर्ने थिए होला तर उनले काम सुरु गरेदेखि अहिलेसम्म एक दिन पनि बिदा लिएर कहिकतै गएका छैनन् । श्रेष्ठ प्रति प्रश्न गर्छन् — “मेरो घर नै सडक हो यहाँ हिड्ने यात्रुहरु मेरा आफन्त हुन् अव तपाई आफै भन्नुस् मैले बिदा लिएर कसलाई भेट्न जानु ?” केही दिन अघि उनी तानसेनमा आयोजित एक कार्यक्रमका बीच सम्मानित समेत भएका छन् ।
    फोटोः फाइल

    पाल्पा समाचार डटकम पाल्पाबाट बिगत ९ वर्षदेखि प्रकाशित लोकप्रिय स्थानीय पत्रिका पाल्पा समाचारपत्र साप्ताहिकको अनलाइन संस्करण हो । पाल्पा समाचारपत्र साप्ताहिकले स्थानीय बिषयबस्तुलाई खोजमुलक रुपमा प्रकाशन गर्दै आएको छ ।